Kurdên Swêdê zilma li ser xiristiyanên Mûsilê rûreşkir
Daxuyanî
Komîteya Hevkarî ya Hêzên Siyasî yên Kurd û Kurdistanî li Swêdê ku ji 27 partî û rêxistinên siyasî yên ji herçar beşên Kurdistanê pêk hatiye, kuştin û derxistina Mesîhîyan bi zorê (Kildanî, Suryanî û Aşûrî) ji bajarê Mûsilê û ji hemî deverên din yên Îraqê, bi tundî riswa û şermezar dike û em li hember vê tawana mezin nerazîbûna xwe diyar dikin.
Berî çend rojan, di nav heftiyekê de, piştî terorkirina hejmarek birayên me Mesîhî yên bajarê Mûsilê, pirtir ji hezar malbatên Kildanî, Suryanî û Aşûrî ji cihê bav û bapîrên xwe bajarê Mûsilê (Ninneva) hatin derbederkirin. Niha ew belav bûne li deverên aram li bajarên biçûk, wek El-qûş, Bertîle, Betnaya, Tilkêf, Tillisqof, Bextîda, Qereqoş û gelek cîhên din. Herweha hinek ji wan, berê xwe dane Herêma Kurdistanê jî wek bajarê Dihok, Zaxo û Hewlêr.
Li Mûsilê gelek avahiyên hevwelatiyên sivîl ên bêguneh, ji layê terorîst û hevkarên wan ve hatine şewitandin û wêrankirin. Di rastiyê de, bergîrîkirin û parastina birayên mesîhî yên bajarê Mûsilê erkê ser milê Hikûmeta Federal ya Îraqê ye; diviya Hikûmeta Îraqê bi lezûbez bihata hawara birayên mesîhi yên Mûsilê û bajêr ji teror û terorîstan paqij kiriba, da ku birayên mesîhî bikarîbûna vegerin ser mal û milkên xwe û jiyaneke rehet û di tenahiyê de bijîn.
Komîteya Hevkarî pişitgiriya xwe bi temamî ji bo maf û daxwazên rewa yên gelê Kildanî, Suryanî û Aşûrî diyar dike.
Di heman demê de, Komîteya Hevkarî helwesta Serokayetiya Herêmê, ya Parlaman û Hikûmeta Kurdistanê, bi qedrekî bilind dinirxîne ku bi awayekî lezgîn çûne hawara birayên xwe yên Mesîhî û hemî harîkariyên pêwîst pêşkêşî wan kirine û nerazîbûna xwe jî li hemberî vê tawanê diyar kirine.
Komîteya Hevkarî ya Hêzên Siyasî yên Kurd û Kurdistanî li Swêdê
Stockholm
21.10.2008
No comments:
Post a Comment